दहावी उत्तीर्ण असलेल्या उमेदवारांसाठी नोकरीची संधी आहे. या उमेदवारांना महाराष्ट्र राज्य वीज वितरण कंपनी लिमिटेड अंतर्गत नोकरी करता येणार आहे. यासाठी कंपनीच्या अधिकृत संकेतस्थळावर जाहिरात प्रसिद्ध करण्यात आली असून पदासाठी लागणारी शैक्षणिक अर्हता, वयोमर्यादा, अनुभव, अर्जाची शेवटची तारीख यांचा सविस्तर तपशील देण्यात आला आहे. उमेदवारांना सोलापूर येथे नोकरी करावी लागणार आहे. सोलापूर महावितरणमध्ये शिकाऊ उमेदवार म्हणजे ‘अप्रेंटिस’ची पदे भरली जाणार आहेत. दहावी उत्तीर्ण उमेदवार या पदांसाठी अर्ज करु शकतात. यासोबतच पदानुसार मान्यताप्राप्त औद्योगिक प्रशिक्षण संस्थेमधून शिक्षण पूर्ण केलेले असावे.

वीजतंत्री किंवा तारतंत्री या शाखेतून दोन वर्ष कालावधीचा (आय.टी.आय.) औद्योगिक प्रशिक्षण उत्तीर्ण असणाऱ्या उमेदवारांना अर्ज करता येणार आहे. एक वर्षाच्या कालावधीसाठी ही भरती केली जाणार आहे, याची उमेदवारांनी नोंद घ्यावी. पदभरतीसाठी अर्ज करताना उमेदवारांनी वैयक्तिक माहितीचा तपशील, दहावी, बारावी आणि शैक्षणिक प्रमाणपत्रे, शाळा सोडल्याचा दाखला, जातीचा दाखला (मागासवर्गीय उमेदवारांसाठी), ओळखपत्र (आधारकार्ड किंवा वाहनपरवाना) आणि पासपोर्ट साईझ फोटो हे सोबत जोडणे आवश्यक आहे.या पदासाठी आरक्षित वर्गातील उमेदवारांना पदभरती आणि वयोमर्यादेमध्ये सरकारी नियमानुसार सवलत देण्यात येणार आहे. याचा सविस्तर तपशील जाहिरातीमध्ये देण्यात आला आहे. तसेच उमेदवारांना संबंधित संस्थेने दिलेल्या अटी आणि शर्थींचे पालन करणे आवश्यक आहे.

उमेदवारांना ऑनलाइन पद्धतीने अर्ज करता येणार आहे. ३० एप्रिल २०२३ ही अर्ज करण्याची शेवटची तारीख आहे. अर्ज करण्यापुर्वी उमेदवारांनी जाहिरात काळजीपूर्वक वाचावी. अर्जामध्ये काही त्रुटी असल्यास किंवा अर्ज दिलेल्या मुदतीनंतर आल्यास बाद करण्यात येईल, याची उमेदवारांनी नोंद घ्यावी.