ब्रिटनमध्ये ‘गॉड सेव्ह द किंग’ च्या जयघोषात किंग चार्ल्स यांच्या शिरी शुद्ध सोन्याचा सेंट एडवर्डचा मुकुट परिधान केला गेला. दीर्घ प्रतीक्षेनंतर राजा चार्ल्स तिसरे यांचा राज्याभिषेक झाला. किंग चार्ल्स हे 1200 वर्षांच्या ब्रिटिश राजेशाहीतील 62 वे राजा आहेत. राणी एलिझाबेथ द्वितीय यांनी 70 वर्षे ब्रिटनच्या सिंहासनावर राज्य केले. गेल्या वर्षी त्यांच्या निधनानंतर राजा चार्ल्स यांना हे सिंहासन मिळाले. सन 1937 नंतर प्रथमच ब्रिटनला राजा मिळाला आहे. सन 1830 मध्ये विल्यम चौथे यांचा राज्याभिषेक झाला. तेव्हा विल्यम चौथे यांचे वय 64 वर्षे होते. किंग चार्ल्स 2022 मध्ये राजे झाले, तेव्हा त्यांचे वय 73 वर्षे होते.
लंडनच्या ऐतिहासिक ‘वेस्टमिन्स्टर ॲबे’ मध्ये आतापर्यंत ब्रिटनचे 39 राजे आणि राण्यांचा राज्याभिषेक झाला आहे. ब्रिटनचा राजा तेथील सर्व चर्चचा सर्वोच्च गव्हर्नर असल्याने राज्याभिषेक नेहमीच चर्चमध्ये होत आला आहे. तब्बल 70 वर्षांनंतर झालेला हा राज्याभिषेक अनेक अर्थांनी अभूतपूर्व आहे.
राजा चार्ल्स यांच्या राज्याभिषेक सोहळ्यात कँटरबरीचे आर्चबिशप जस्टिन वेल्बी यांच्या नेतृत्वाखाली सुमारे 2 तास चाललेल्या राज्याभिषेकाचे बहुतांश विधी जुनेच होते; परंतु त्यांच्यासोबत अनेक नवीन गोष्टींचाही समावेश करण्यात आला होता. पर्यावरण, परिसंस्था आणि जैवविविधतेसाठी काम करणाऱ्या प्रिन्स चार्ल्स यांच्या राज्याभिषेकाच्या कार्यक्रमात ते खास बनविण्याचा प्रयत्न करण्यात आला. कार्यक्रमासाठी फक्त हंगामी फुले आणि पानांचा वापर करण्यात आला. राज्याभिषेकात पारंपरिक वस्त्रे परिधान करण्यात आली होती. राजावर शिंपडण्यासाठी वापरण्यात येणारे तेल देखील शाकाहारी होते. यावेळी चर्चमध्ये प्रथमच महिला बिशप देखील उपस्थित होत्या. एवढेच नाही तर ब्रिटनमधील गैर-ख्रिश्चन धर्म आणि सेल्टिक भाषिक लोकांचाही यात मोठा सहभाग होता. पंतप्रधान ऋषी सुनक यांच्या रूपाने प्रथमच भारतीय वंशाच्या हिंदू नेत्याने याप्रसंगी बायबलच्या काही ओळी वाचण्याची प्रथा पूर्ण केली. राजघराण्यातील सदस्य आणि चर्चमध्ये उपस्थित असलेल्या खास पाहुण्यांच्या गर्दीत काही सामान्य लोकांचाही समावेश होता.
दरम्यान, राज्याभिषेक कार्यक्रमावरील खर्चाबाबत कोणतीही अधिकृत आकडेवारी देण्यात आलेली नाही. या कार्यक्रमासाठी सुमारे 5 ते 100 दशलक्ष पौंड खर्च केले गेले असा अंदाज आहे. ब्रिटनची आर्थिक स्थिती फारशी चांगली नाही. वाढती महागाई आणि ऊर्जा संकटाच्या काळात सर्वसामान्यांना मोठ्या अडचणींचा सामना करावा लागत आहे. अशा स्थितीत या राजेशाही खर्चाने झालेल्या राज्याभिषेकावर टीका होत आहे.
ब्रिटीश सम्राट अजूनही अधिकृतपणे आणखी 13 राष्ट्रकुल देशांचे प्रमुख आहेत. वसाहतवादी राजवट संपुष्टात येऊनही ब्रिटनच्या अधिपत्याखाली असलेल्या देशांमध्ये आणि उर्वरित जगामध्येही ब्रिटीश राजेशाहीसाठी विशेष स्वारस्य निर्माण झाले आहे. राजा चार्ल्सच्या राज्याभिषेकाच्या निमित्तानेही जगभरातून लोक लंडनमध्ये पोहोचले आहेत. सरकारी प्रतिनिधी, राजकारणी आणि राजघराण्यातील लोकांशिवाय सर्वसामान्यांची संख्याही मोठी दिसून आली. लंडनच्या रस्त्यांवर हजारो लोकांनी गर्दी केली होती. मध्य लंडनला निळ्या, लाल आणि पांढऱ्या रंगात रंगविण्यात आले. सगळीकडे युनियन जॅक डोलत होते. राज्याभिषेक कार्यक्रम साधेपणाने आणि थाटामाटात पार पाडण्याचे आश्वासन दिले होते; मात्र सर्वसामान्यांच्या उत्साहाने तो रंगतदार झाला. बकिंगहॅम पॅलेसच्या बाहेरील मॉलमध्ये राज्याभिषेकाच्या खूप आधीपासून मेजवानी सुरू झाली होती. 1-2दिवसांपूर्वी लोक तिथे तंबू ठोकून जमले आणि उत्सव सुरू झाला.
लंडन पोलिसांनी राज्याभिषेकाच्या काही तास आधी अनेक आंदोलकांसह राजेशाही विरोधी गट रिपब्लिकच्या प्रमुखाला अटक केली. हे लोक मिरवणुकीच्या मार्गावर विरोध करण्यासाठी जमले होते. रिपब्लिकने यापूर्वी सांगितले होते, की ते ब्रिटीश राजेशाही विरोधात सर्वात मोठे आंदोलन करेल. लंडनच्या पोलीस प्रमुखांनी शुक्रवारीच आंदोलकांनी लोकांच्या उत्सवात आणि आनंदात अडथळा आणल्यास त्यांच्यावर कारवाई केली जाईल, असा इशारा दिला होता.