ब्युटी पार्लर हा अतिशय सोपा, कमी गुंतवणुकीचा आणि जास्त फायदेशीर सेवा व्यवसाय आहे. आजच्या युगात घरोघरी सौंदर्यसेवेची मागणी झपाट्याने वाढत आहे. आज बहुतांश महिलांना नोकरीसाठी घराबाहेर पडावे लागते. अशा परिस्थितीत त्यांना नेहमीच ‘टिपटॉप’ असणे आवश्यक आहे. वेळेअभावी महिलांना त्यांच्या व्यस्त जीवनात दिवसाच्या २४ तासांतून स्वत:साठी थोडा वेळ काढता येत नाही. अशा महिलांना घरी बसून सौंदर्यसेवा दिल्यास त्या आनंदाने तुमची सेवा घेतील. सौंदर्यसेवेची मागणी पाहता घरोघरी सौंदर्य सेवा देवून चांगले पैसे मिळू शकतात. ब्युटी पार्लरचा कोर्स केलेल्या महिलांसाठी हा व्यवसाय अधिक चांगला आहे.

घरोघरी सौंदर्य सेवा म्हणजे काय, ते प्रथम जाणून घेऊया. घरोघरी सौंदर्य सेवा म्हणजे महिला ब्युटी पार्लरमध्ये येत नाहीत तर ‘ब्युटीशियन’ला त्यांच्या घरी बोलावतात. ब्युटीशियन ब्युटी पार्लरशी संबंधित संपूर्ण किट म्हणजेच सौंदर्य उपचार घेवून ग्राहकांच्या घरी पोहोचतात. ज्या महिलांनी ब्युटी पार्लरचा कोर्स केला आहे, ज्या बजेटअभावी ब्युटी पार्लर सुरू करू शकत नाहीत किंवा घरात जागेअभावी ब्युटी पार्लर उघडू शकत नाहीत, अशा परिस्थितीत घरोघरी सौंदर्य देऊन त्यांना चांगले पैसे मिळू शकतात.

ज्या महिलांनी ब्युटी पार्लरचा कोर्स केलेला नाही, आणि त्यांना घरोघरी सौंदर्य सेवा व्यवसायाचा अवलंब करायचा आहे, अशा महिलांसमोर दोन पर्याय आहेत. पहिली म्हणजे ती ब्युटी पार्लरमधून कमी कालावधीचा कोर्स करून हा व्यवसाय सुरू करू शकते; किंवा पगार किंवा कमिशनवर दोन-चार सौंदर्यतज्ज्ञ महिलांना सोबत ठेवून हा व्यवसाय सुरू करू शकते. सौंदर्य सेवेसाठी कॉल आल्यावर, तिला तिच्या ठिकाणाहून सौंदर्य उपचारांसाठी पाठवून ती चांगली कमाई करू शकते.

या सेवेमध्ये तुम्ही मॅनिक्युअर, पेडीक्युअर, मेकअप, हेअर कटिंग, फेशियल, आय ब्रो, ब्युटी ट्रीटमेंट, हेअर कलर, नेल आर्ट, ब्राइडल मेकअप आणि हेना डिझाइन यासारख्या सेवा देऊ शकता. अगदी कमी गुंतवणुकीत घरोघरी सौंदर्य सेवा व्यवसाय सुरू करता येतो. या व्यवसायात ब्युटी पार्लरसारख्या महागड्या फर्निचरची आणि सजावटीची गरज नाही. यासाठी मेकअप आणि ब्युटी ट्रीटमेंटशी संबंधित उत्पादने आणि उपकरणे असणे आवश्यक असते, जे तुम्ही बॅगेत भरून कुठेही सहज नेऊ शकता.

घरोघरी सौंदर्य सेवा व्यवसायासाठी प्रसिद्धी आवश्यक आहे. जोपर्यंत तुम्ही प्रसिद्धी करणार नाही, लोकांना सांगणार नाही, तोपर्यंत आपण व्यवसाय सुरु केला आहे, हे कुणासही कळणार नाही. घरोघरी सौंदर्य सेवा व्यवसायाच्या सुरुवातीला प्रसिद्धीची खूप गरज आहे. प्रसिद्धीशिवाय व्यवसाय सुरू करता येत नाही. जसजशा स्त्रिया ओळखू लागतील, तशा त्या नियमित ग्राहक बनतील. घरोघरी सौंदर्य सेवा व्यवसाय वाढू लागेल. प्रसिद्धीसाठी समाजमाध्यमांचा आधार घेता येईल. सौंदर्य सेवेसोबतच तुम्ही सौंदर्य उत्पादने विकून तुमचे उत्पन्न देखील वाढवू शकता. जमेल तेवढी मौखिक जाहिरात करा. कारण मौखिक जाहिरात ही कागदी जाहिरातीपेक्षा वेगाने पसरते. यासाठी कोणतेही अतिरिक्त पैसे खर्च करावे लागत नाहीत.

प्रसिद्धीसाठी तुम्ही वृत्तपत्रामध्ये जाहिरात देऊ शकता. शहरात ये-जा करता येईल, तेवढ्या भागात फलक लावता येतील. पत्रिका छापून वितरितही करता येतात. तुमच्या सेवेची माहिती तुमच्या मित्रांना आणि ओळखीच्या लोकांना व्हाट्सएपच्या माध्यमातून देत रहा. ऋतूनुसार सौंदर्य दिनदर्शिका तयार करा. ज्यामध्ये कोणत्या ऋतूमध्ये कोणत्या ‘ब्युटी ट्रीटमेंट’ ची आवश्यकता आहे याची माहिती द्या. सणासुदीच्या काळात दिल्या जाणाऱ्या विशेष सेवेचा उल्लेख करा. ग्राहकाला दिलेल्या वेळेच्या 10 मिनिटे आधी पोहोचण्याचा प्रयत्न करा. सौंदर्य उपचारात लागणारे सर्व साहित्य सोबत ठेवा. एकाच ठिकाणी सेवा देत असताना दुसरीकडे जाण्याची घाई करू नका. सौंदर्य उपचारांसाठी पूर्ण वेळ द्या. जेणेकरून ग्राहक तुमच्या कामावर पूर्णपणे समाधानी असेल. नियमित ग्राहकांसाठी काही योजना तयार करा. सौंदर्य सेवेसाठी तुम्ही कोणतेही उत्पादन वापरता, ते ब्रँडेड असले पाहिजे. कमी किंमतीची सौंदर्य उत्पादन वापरू नका. कधीकधी अशी उत्पादने चेहऱ्याचे सौंदर्य खराब करतात. यामुळे तुमचा व्यवसाय बंद होवू शकतो.