पुरातत्त्व विभागातर्फे ‘प्रागैतिहासिक प्रशिक्षण’ या विषयावरील विशेष कार्यशाळा पार पडली. या कार्यशाळेचे उद्घाटन पुरातत्त्व विभागाचे महासंचालक प्रा. किशोर बासा यांनी केले. जागतिक वारशाचा दर्जा लाभलेली प्रसिद्ध ‘हम्पी’ ही वास्तू दत्तक घेण्याबाबत जिंदाल समूह इच्छूक आहे. त्यांच्यासोबत चर्चा सुरू असल्याची माहिती प्रा. किशोर बासा यांनी दिली. यावेळी विभागाचे अतिरिक्त महासंचालक आलोक त्रिपाठी, संचालक डॉ. नंदिनी भट्टाचार्य साहू, मुंबईचे विभागीय संचालक डॉ. के. लुर्दुस्वामी उपस्थित होते.

यावेळी पुरातत्त्व विभागाचे अतिरिक्त महासंचालक आलोक त्रिपाठी पत्रकारांशी संवाद साधताना म्हणाले की, भारतीय पुरातत्त्व विभागातर्फे गेल्या काही वर्षांपासून हरियाणातील राखीगडी येथे उत्खनन सुरू आहे. पुरातत्त्व विभागाच्या दृष्टिकोनातून देशातील सगळ्यात पुरातन संस्कृतीचे अवशेष या भागात सापडले आहेत. गेल्या काही वर्षांत सापडलेले हे अवशेष आता संग्रहालयात ठेवले जाणार आहेत. राज्य सरकार आणि भारतीय पुरातत्त्व विभागातर्फे हे संग्रहालय उभारले जाणार आहेत.

या कार्यक्रमादरम्यान, प्रा. बासा यांच्याशी पत्रकारांनी संवाद साधला. त्यांनी ‘हेरिटेड २.०’ योजनेबाबत माहिती दिली. ते म्हणाले की, देशातील सर्व पुरातन संरक्षित वास्तूंची जबाबदारी भारतीय पुरातत्त्व विभागाकडे आहे. मागील काही वर्षांमध्ये या विषयाबाबत जागृती वाढल्याने पुरातत्त्व विभागाच्या वास्तुंना भेट देणाऱ्या पर्यटकांची संख्याही बरीच वाढली आहे. त्यासाठी या परिसरात काही प्राथमिक सोयी-सुविधा पुरविणे आवश्यक आहे. कॉर्पोरेट कंपन्यांनी त्यांच्या कॉर्पोरेट सामाजिक जबाबदारी अंतर्गत या सुविधा पुरविण्यासाठी काही राष्ट्रीय स्मारक दर्जाच्या वास्तू दत्तक घ्याव्यात, असा प्रस्ताव आम्ही मांडला. त्यासाठी ‘वारसा दत्तक घ्या’ ही योजना सुरू केली.