आपल्या देशात अनेक कारणांसाठी विजेचा वापर मोठ्या प्रमाणात होतो. मागणीनुसार पुरवठा होत नसला तरी वीज जोडणी साहित्याला मोठी मागणी असते. विजेचा वापर करून अनेक उत्पादने तयार केली जातात. आता अगदी ग्रामीण भागातही वीज पोहोचली आहे. पारंपरिक वीज निर्मितीबरोबरच विजेची मागणीही दिवसेंदिवस वाढत असल्याने अपारंपरिक स्रोतांपासून वीजनिर्मितीचे मोठे प्रकल्प आपल्या देशात सुरू होत आहेत. नदीवर बंधारे बांधून वीजपुरवठा करणे शक्य नसल्याने सरकारने अशा खासगी वीजनिर्मिती प्रकल्पांना परवानगी दिली आहे. पवनचक्क्या, अणुऊर्जा तसेच कारखान्यातील टाकाऊ पदार्थांपासून वीजनिर्मिती करता येते. विविध विद्युत उपकरणांमध्ये वीज जोडणी करावी लागते. त्याचप्रमाणे कंपन्या, कारखाने आणि मोठमोठे शॉपिंग कॉम्प्लेक्स, मॉल्स, कंपन्या, कारखाने देखील पंखे, ट्यूबलाइट, एअर कंडिशनर, कुलर, फ्रीजशिवाय अनेक कामांसाठी वीज वापरतात. विजेचा प्रवाह या उपकरणापर्यंत वाहून नेण्यासाठी विद्युत वाहक आणि वेष्टनबंद तारा असलेल्या साहित्याने जोडणी करावे लागते. अशा वीज जोडणीचे साहित्य बँकेलाइटच्या इन्सुलेट प्लास्टिकपासून बनविले जाते.

प्लास्टिकच्या पट्ट्या, पाईप्स, बटणे, होल्डर, स्विचेस, जोडणीसाठी वापरल्या जाणाऱ्या पिना यांसारख्या वस्तू तयार करण्यासाठी साच्याचा वापर करावा लागतो. प्लास्टिक वितळवून ते साच्यामध्ये ओतले जाते. असे साचे कार्बन स्टीलपासून तयार केले जातात. अशा वीज जोडणी सामग्रीमध्ये स्वीच बोर्ड किंवा लाईट बटणे, स्प्रिंग्स, पिन आणि स्क्रू असतात. पितळ धातूपासून बनविलेल्या अशा वस्तू प्लास्टिकच्या उपकरणांमध्ये हँड प्रेस मशीन किंवा हाताने ठेवल्या जातात. वीज जोडणीसाठी साहित्य तयार करताना उच्च दर्जाचे साहित्य वापरावे. विजेच्या धक्क्याने मनुष्य जखमी होण्याची शक्यता असल्याने अशा वस्तू बनवताना लोभापोटी कमी दर्जाच्या वस्तू बनवू नयेत. आजचे ग्राहक स्मार्ट आणि हुशार असल्याने तुमचा ब्रँड आणि त्या वस्तूंची सुरक्षितता तपासल्यानंतरच ते अशा वस्तू खरेदी करतात. तुम्ही उच्च दर्जाच्या वस्तूंचे उत्पादन करून तुमच्या विशिष्ट नावाचा ट्रेडमार्क आणि ब्रँड तयार करू शकता.

दिवसेंदिवस वीज जोडणी साहित्याची मागणी वाढत असल्याने नवीन उद्योजकांनी तांत्रिक प्रशिक्षण घेऊन उत्पादन सुरू केले, तर भविष्यात उत्पादन व विक्रीचा विस्तार वाढेल. प्रत्येक घरात वीज जोडणी करणे आवश्यक असते. एकदा वीज जोडणी झाल्यावर कधीतरी वीज सामग्रीची छोटी-मोठी दुरुस्ती करावी लागते. त्यामुळे वीज जोडणी सामान खरेदी करण्यासाठी ग्राहक वारंवार येण्याची शक्यता असते. त्यामुळे उत्पादनाला ब्रँडेड बनवा. मोठ्या उंच इमारतींना जास्त प्रमाणात वीज जोडणी सामग्रीची आवश्यकता असते. एकदा व्यवसायास सुरुवात केल्यावर आपण बांधकाम व्यावसायिक, अभियंते, कंत्राटदार यांना भेटू शकता. त्यांना आवश्यक दर्जाचे साहित्य पुरवू शकता.

वीज जोडणीचे साहित्य विकणारे घाऊक व्यापारी असतात. आपण त्यांच्याकडून ऑर्डर घेऊन वस्तू वितरीत करू शकता. शहरात व खेड्यापाड्यातही इलेक्ट्रिकलची छोटी-मोठी दुकाने आहेत. आपण आपला माल थेट त्यांच्यापर्यंत पोहोचवू शकतात. या व्यवसायासाठी युरिया फॉर्मल्डिहाइड, फिनॉल फॉर्मलडीहाइड, बेकलाइट प्लास्टिक, स्प्रिंग्स, पिन, स्क्रू, लहान स्क्रू, नट इत्यादी कच्चा माल आवश्यक असतो. यांत्रिक मोल्डिंग प्रेस मशीन , कार्बन स्टील मोल्ड, हायड्रोलिक प्रेस मशीन किंवा हँड प्रेस मशीन इत्यादी यंत्रसामग्रीची आवश्यकता असते.