धाराशीव जिल्ह्यातील भूम तालुक्यात ईट या गावामध्ये गावकऱ्यांना अनोखी मिरवणूक पहायला मिळाली. विशेष म्हणजे ही मिरवणूक पाहण्यासाठी अख्खा गाव गोळा झाला होता. सरपंच संजय असलकर आणि त्यांच्यासोबत असलेले ग्रामपंचायत सदस्य सयाजी हुंबे यांची उंटावरून गावातून वाजतगाजत मिरवणूक काढण्यात आली. यावेळी फटाक्यांची आतषबाजीदेखील करण्यात आली.

ईट हे तालुक्यातील मोठ्या बाजारपेठेचे गाव आहे. या गावची ग्रामपंचायतही मोठी आहे. संजय असलकर गावचे सरपंच असून ते मनमानी कारभार करतात, असा आरोप अन्य ग्रामपंचायत सदस्यांनी करुन त्यांच्या विरोधात अविश्वास ठराव दाखल केला. ही ग्रामपंचायत १४ सदस्यांची आहे. त्यापैकी १३ सदस्यांनी हा ठराव दाखल केला. ठरावावर मतदान घेण्यासाठी १३ डिसेंबर रोजी विशेष बैठकीचे आयोजन करण्यात आले. त्या बैठकीला सरपंचांसह त्यांच्या सोबतचा एक सदस्य असे दोघेच उपस्थित राहिले. अविश्वास ठराव दाखल केलेले १३ जण या बैठकीला गैरहजर राहिले. त्यामुळे अविश्वास ठराव फेटाळला गेला. असलकर यांचे सरपंचपद कायम राहिल्याने ते पुन्हा सरपंचपदी निवडून आले. त्यामुळेच या मिरवणुकीचे आयोजन केले होते.