अयोध्येत लवकरच होणाऱ्या राम मंदिर उद्घाटन सोहळ्याचे पडसाद देश-विदेशातही उमटू लागले आहेत. मंदिराच्या उद्घाटन सोहळ्यासाठीची पूर्वतयारी देशभरात उत्साहाने सुरू आहे. एवढेच नव्हे तर बाजारपेठेतही विविध प्रकारची खरेदी होऊ लागली आहे. सध्या सोनारांकडे श्रीराम मंदिर किंवा प्रभू श्रीरामांची प्रतिमा असलेल्या चांदीच्या नाण्यांची खरेदी सुरू झाली आहे. याची दिवसाची उलाढाल लाखो रुपयांची आहे.

सध्या राम मंदिराच्या प्रतिकृतींच्या मागणीत प्रचंड वाढ झालेली दिसत आहे. केवळ दागिनेच नव्हे, तर विविध कला प्रकारातील कारागिरांनी बनविलेल्या कलाकृतींचीही मागणी वाढली आहे. सध्या चांदीच्या नाण्यांची मागणी वाढली असून काही ठिकाणी आगाऊ नोंदणी केली जात आहे. ऐन लग्नसराईच्या दिवसांत लग्नाच्या दागिन्यांपेक्षा श्रीरामाचे चित्र व राममंदिर कोरलेल्या चांदीच्या नाण्यांनाच मागणी अधिक दिसत आहे. देवीदेवतांची नाणी खरेदी करणे यात नवीन काही नाही. परंतु, आता अयोध्येतील श्रीराम मूर्ती प्रतिष्ठापनेच्या निमित्ताने श्रीराम प्रतिमा व मंदिर प्रतिकृती असणाऱ्या चांदीच्या नाण्यांचे ‘वजन’ बाजारात अधिकच वाढलेले आहे.