उपमुख्यमंत्री अजित पवार यांच्या मंत्रालयातील दालनात श्री क्षेत्र महाबळेश्वर, प्रतापगड, निसर्ग पर्यटन विकास आराखडा, सह्याद्री व्याघ्र प्रकल्प व पर्यटन विकास आराखड्याबाबतची आढावा बैठक झाली. महाबळेश्वर, प्रतापगड, सह्याद्री व्याघ्र प्रकल्प पर्यटन विकास आराखड्याबाबत उपमुख्यमंत्र्यांनी यावेळी निर्देश दिले. ते म्हणाले की, आराखड्यानुसार कामे करताना मूळ वास्तू आणि परिसराच्या सुशोभीकरणाची कामे नैसर्गिक रंग वापरून केली जातील. बांधकामाचे साहित्य पर्यावरणपूरक वापरले जाईल. परिसराचे मूळ सौंदर्य राखले जाईल, अशी कामे प्रस्तावित करावीत. प्रशासनाने हे प्रस्ताव तातडीने शासनाकडे सादर करावेत.

या बैठकीला राज्य उत्पादन शुल्क मंत्री तथा साताऱ्याचे पालकमंत्री शंभूराज देसाई, आमदार मकरंद पाटील, दूरदृश्य संवाद प्रणालीद्वारे आमदार शिवेंद्रसिंहराजे भोसले, नियोजन विभागाचे प्रधान सचिव सौरभ विजय, पर्यटन विभागाच्या सचिव जयश्री भोज,सार्वजनिक बांधकाम विभागाचे सचिव संजय दशपुते, वित्त विभागाच्या सचिव ए.शैला, सातारा जिल्हाधिकारी जितेंद्र डुडी, पुरातत्व विभागाचे उपसंचालक हेमंत दळवी, आदी उपस्थित होते. साताऱ्याचे जिल्हाधिकारी डुडी यांनी सह्याद्री व्याघ्र प्रकल्प पर्यटन विकास आराखड्याचे सादरीकरण केले. या प्रकल्पांतर्गत राबविण्याच्या संभाव्य उपक्रमांची माहिती दिली.