छत्रपती संभाजीनगरमध्ये उच्च व तंत्र शिक्षण विभाग, ग्रंथालय संचालनालय-मुंबई व जिल्हा ग्रंथालय अधिकारी कार्यालय यांच्या संयुक्त विद्यमाने ‘छत्रपती संभाजीनगर ग्रंथोत्सव 2023’ चे आयोजन करण्यात आले आहे. समता दर्शन वाचनालय सभागृह, समता नगर येथे या महोत्सवाचे शानदार उद्घाटन झाले. प्रारंभी सकाळी क्रांती चौकातून ग्रंथदिंडी काढण्यात आली. गृहनिर्माण मंत्री अतुल सावे यांच्या हस्ते ग्रंथपूजन करण्यात आले. या ग्रंथदिंडीत विद्यार्थी व साहित्यप्रेमी नागरिकांनी सहभाग घेतला. ग्रंथदालनाचे उद्घाटनही मान्यवरांच्या हस्ते करण्यात आले.

याप्रसंगी जिल्हा ग्रंथालय अधिकारी सुभाष साबळे, सहाय्यक संचालक ग्रंथालय सुनील हुसे, माहिती अधिकारी डॉ. मीरा ढास, ग्रंथालय संघाचे कार्यवाह गुलाबराव मगर, कैलास पब्लिकेशनचे कैलास आतकरे, राजशेखर बालेकर, समता दर्शन संस्थेच्या अध्यक्ष वर्षा वासाडीकर यांच्यासह विद्यार्थी, नागरिक आणि ग्रंथप्रेमींची उपस्थिती होती.  ज्येष्ठ साहित्यिक व समीक्षक ऋषिकेश कांबळे म्हणाले की, मनाची जोपासना ग्रंथ करत असतात. जीवनाचे संकल्प करण्याचे आणि ते प्रत्यक्ष आणण्याचे सामर्थ्य ग्रंथामधून व्यक्तीला मिळत असते. जीवन विकासाच्या प्रक्रिया समजून घेण्यासाठी ग्रंथाशिवाय उपाय नाही. संत वाड.मयाने परोपकाराची, समतेची भावना आपल्या साहित्यातून वाढीस लावली. अनुभवसिद्धता मानवाला वाचनातून येत असते. अभिव्यक्तीसाठी ग्रंथाचे महत्त्व अनन्यसाधारण आहे.

बुधवार दि.१४ रोजी सकाळी 11 वा. ‘वाचन संस्कृती संवर्धनात माझा खारीचा वाटा’ या विषयावर अध्यक्ष डॉ. दादा गोरे, दै.सकाळचे मराठवाडा आवृत्ती संपादक संतोष शालीग्राम, लेखाधिकारी शरद भिंगारे, साहित्यिक डॉ. ललित अधाने, साईबाबा वाचनालयाचे सचिव दुष्यंत आठवले, प्रकाशक भास्कर सरोदे विारमंथन करतील. दुपारी 2 वा. परिसंवाद होईल. ‘सार्वजनिक ग्रंथालयाच्या विकासासाठी विविध योजना’ हा विषय असेल. दुपारी 4 वा.समारोप होईल. अध्यक्षस्थानी माजी कुलगुरु डॉ. सुधीर गव्हाणे, डॉ. धर्मराज वीर, जिल्हा माहिती अधिकारी डॉ. मिलिंद दुसाने, सहाय्यक ग्रंथालय संचालक सुनिल हुसे, मसापचे कोषाध्यक्ष कुंडलिक अतकरे यांची उपस्थिती असेल.  या ग्रंथोत्सवात सहभागी होण्याचे आवाहन करण्यात आले आहे.