दौलत नगर, पाटण येथे दि. १५ ते १७ एप्रिल  दरम्यान महाराष्ट्र शासनाचा पर्यटन विभाग, कृषी उत्पादन बाजार समिती पाटण आणि जिल्हा प्रशासन यांच्या संयुक्त विद्यमाने ‘कोयना दौलत डोंगरी महोत्सव २०२५’ चे आयोजन  करण्यात आले आहे. शेती, ग्रामीण पर्यटन आणि स्थानिक संस्कृतीला प्रोत्साहन देण्याच्या उद्देशाने या महोत्सवाचे आयोजन केले आहे. ‘कोयना दौलत डोंगरी महोत्सव २०२५’ हा संस्कृती, साहस आणि ग्रामीण विकासाचा परिपूर्ण संगम आहे. ग्रामीण अर्थव्यवस्थेला बळकटी देणारा महोत्सव ठरेल, अशी माहिती पर्यटन मंत्री  शंभूराज देसाई यांनी  दिली.

महोत्सवात शेतकऱ्यांना आपली उत्पादने, आधुनिक शेती तंत्रज्ञान आणि नवीन संशोधन मांडण्याची संधी मिळेल.  प्राणी आणि पक्षी प्रदर्शन असेल. सर्व वयोगटांसाठी मनोरंजनात्मक उपक्रम, खाद्यपदार्थांचे दालन आणि स्थानिक हस्तकलांचे प्रदर्शन असणारा आनंद मेळा असेल. महिला उद्योजकांना आपली उत्पादने विक्रीसाठी व्यासपीठ दिले जाईल. तसेच, घोडेस्वारी, जलक्रीडा आणि इलेक्ट्रिक बग्गी राईड्स यांसारखे उपक्रम असतील. या महोत्सवात सर्व नागरिकांना, शेतकऱ्यांना, पर्यटकांना आणि उद्योजकांना सहभागी होण्याचे आवाहन पर्यटन संचालनालयाकडून करण्यात आले आहे.