भारताच्या ‘ऑपरेशन सिंदूर’ने केवळ दहशतवाद्यांवर कठोर कारवाई केली नाही, तर आंतरराष्ट्रीय स्तरावर भारताची प्रतिमा अधिक सशक्त केली आहे. या कारवाईत भारताने इस्रायलच्या धाडसी धोरणांपेक्षा एक पाऊल पुढे जाऊन अधिक संयमित आणि रणनीतिक दृष्टिकोन स्वीकारला. भारताने पाकिस्तान आणि पाकव्याप्त काश्मीरमधील ९ दहशतवादी तळांवर अचूक हवाई हल्ले केले. या कारवाईत जैश-ए-मोहम्मद आणि लष्कर-ए-तैयबा यांसारख्या संघटनांचे मुख्यालय उद्ध्वस्त करण्यात आले. विशेष म्हणजे, भारताने केवळ दहशतवादी तळांवरच हल्ले करून सर्वसामान्य नागरिकांचे नुकसान टाळले, ज्यामुळे आंतरराष्ट्रीय समुदायात भारताच्या संयमिततेचे कौतुक झाले.
पाकिस्तानने प्रत्युत्तरादाखल भारतातील १५ शहरांवर ड्रोन, मिसाईल आणि फायटर जेटद्वारे हल्ल्याचा प्रयत्न केला. मात्र, भारताच्या ‘आकाश’ आणि इतर स्वदेशी हवाई संरक्षण प्रणालींनी हे सर्व हल्ले यशस्वीपणे परतवून लावले. या कारवाईत पाकिस्तानकडून वापरले गेलेले चिनी आणि तुर्की बनावटीचे ड्रोन आणि मिसाईल निष्प्रभ ठरले. इस्रायलने अलीकडील काळात गाझा पट्टीत दहशतवाद्यांविरोधात कारवाई केली असली, तरी त्यात अनेक वेळा सर्वसामान्य नागरिकांचेही नुकसान झाले आहे. त्याच्या तुलनेत, भारताने ‘ऑपरेशन सिंदूर’मध्ये केवळ दहशतवादी तळांवरच हल्ले करून संयम आणि अचूकतेचा आदर्श प्रस्तुत केला. या कारवाईत भारताने आंतरराष्ट्रीय कायद्यांचे पालन करत, दहशतवाद्यांना कठोर संदेश दिला आहे.