वसई-विरारमध्ये ४१ बेकायदेशीर इमारती उभारण्याच्या प्रकरणात सक्तवसुली संचालनालयाने (ईडी) मोठी कारवाई केली आहे. बहुजन विकास आघाडीचे माजी नगरसेवक सीताराम गुप्ता यांच्याविरोधात मनी लॉन्ड्रिंगचा गुन्हा दाखल करण्यात आला असून, ईडीने वसई-विरारमधील १३ ठिकाणी छापे टाकले आहेत.

२००६ मध्ये वसंत नगरी परिसरातील सर्व्हे क्रमांक २२ ते ३० मधील शासकीय आणि खाजगी जमिनीवर अनधिकृतपणे कब्जा करून २०१० ते २०१२ दरम्यान ४१ चार मजली इमारती उभारण्यात आल्या. या इमारतींमध्ये सुमारे २५०० नागरिकांनी घरे विकत घेतली होती. परंतु, नंतर या जमिनी शासकीय असल्याचे स्पष्ट झाल्याने महानगरपालिकेने सर्वोच्च न्यायालयाच्या आदेशानुसार या इमारती पाडल्या. या कारवाईमुळे अनेक कुटुंबे बेघर झाली असून, त्यांच्या पुनर्वसनाचा मुद्दा सध्या चर्चेत आहे.

या प्रकरणात वसई-विरार महानगरपालिकेच्या अधिकाऱ्यांच्या भूमिकेबाबतही प्रश्न उपस्थित करण्यात आले आहेत. शासकीय जागांवर इतक्या मोठ्या प्रमाणात अनधिकृत इमारती उभ्या राहत असताना प्रशासनाने दुर्लक्ष का केले, हा प्रश्न सध्या चर्चेत आहे. या प्रकरणातील पुढील तपास सुरू असून, ईडीच्या कारवाईमुळे वसई-विरारमधील अनधिकृत बांधकामांवर नियंत्रण ठेवण्यास मदत होईल, अशी अपेक्षा आहे.