पंतप्रधान मोदी यांच्या ऑस्ट्रेलिया दौऱ्याचा आज शेवटचा दिवस आहे. आपल्या तीन दिवसीय दौऱ्यात पंतप्रधान मोदींनी अनेक कार्यक्रमांमध्ये भाग घेतला आणि नेत्यांची भेट घेतली. पंतप्रधानांनी सिडनीच्या ऑलिम्पिक पार्कमध्ये हजारो भारतीय प्रवासींना संबोधित केले. यानंतर सिडनीमध्ये पंतप्रधान मोदींना ‘गार्ड ऑफ ऑनर’ही देण्यात आला. यावेळी पंतप्रधान मोदींसोबत ऑस्ट्रेलियन समकक्ष अँथनी अल्बानीजही उपस्थित होते. सिडनी येथे आयोजित मेगा शो दरम्यान, ऑस्ट्रेलियाचे पंतप्रधान अल्बानीज यांनी पंतप्रधान मोदींच्या भेटीबद्दल आभार मानले.
पंतप्रधान नरेंद्र मोदी यांनी तेथील भारतीयांना संबोधित करताना सांगितले की, आज भारत-ऑस्ट्रेलिया संबंधांचा सर्वात मजबूत आणि सर्वात मोठा पाया म्हणजे ‘परस्पर विश्वास आणि परस्पर आदर’ व याचे श्रेय ऑस्ट्रेलियात राहणाऱ्या प्रत्येक परदेशी भारतीयांना जाते. पंतप्रधान मोदींच्या उपस्थितीत ऑस्ट्रेलियातील एका उपनगराचे नाव बदलून ‘लिटिल इंडिया’ करण्यात आले. जे दोन धोरणात्मक भागीदारांमधील मजबूत संबंध दर्शवते.
पंतप्रधान मोदी म्हणाले, “यावर्षी मला तुमच्या पंतप्रधानांचे अहमदाबादमध्ये स्वागत करण्याची संधी मिळाली. आज त्यांनी येथे लिटिल इंडियाच्या पायाभरणीच्या अनावरणात मला पाठिंबा दिला, मी त्यांचे आभार मानतो. ‘लिटल इंडिया’ ही ऑस्ट्रेलियाच्या विकासात भारतीय समुदायाच्या योगदानाची ओळख आहे.”