सध्या पॉलीहाऊसमध्ये शेती करण्याचा कल झपाट्याने वाढत आहे. त्यामुळे आता वर्षभर अनेक फळे आणि भाज्या उपलब्ध होतात. अनेक राज्ये शेतकऱ्यांना पॉलीहाऊस शेतीसाठी अनुदानही देत आहेत; परंतु पॉलीहाऊसमध्ये पुन्हा-पुन्हा अशीच पिके घेतल्याने अनेक रोग वाढत आहेत. त्याचे वेळीच व्यवस्थापन करणे गरजेचे आहे. पॉलीहाऊस शेती-बागायती, पिकांसाठी नियंत्रित वातावरण प्रदान करते; परंतु काही रोगांचा धोका वाढतो. त्यामुळे पॉलीहाऊसमध्ये पिकवलेल्या बागायती पिकांचे रोगांपासून संरक्षण करण्यासाठी योग्य पद्धतीचा अवलंब करावा.

पॉलीहाऊससाठी योग्य जागा निवडणे महत्त्वाचे आहे. रोग पसरण्याची शक्यता असलेली क्षेत्रे टाळल्याने धोका कमी होतो. कृषी उपकरणांची काळजी घ्यावी. बाहेरून कोणतीही शेती उपकरणे वापरली जात असली तरी पॉलिहाऊसमध्ये वापरण्यापूर्वी त्यावर योग्य उपचार करून घ्यावेत, यामुळे पॉलिहाऊसमध्ये रोगाचा प्रसार होत नाही. आलटूनपालटून पिके घेतल्याने रोगाचे चक्र खंडित होण्यास मदत होते. मातीतून पसरणाऱ्या रोगजंतूंचे प्रमाण कमी होते.

रोपांमध्ये पुरेसे अंतर ठेवावे. या पुरेशा अंतरामुळे हवेस खेळण्यास वाव मिळतो. वातावरणातील आर्द्रता कमी होते, आणि रोग प्रसारासाठी अनुकूल परिस्थिती कमी होते. पानांचे ओलेपणा कमी करण्यासाठी अतिसिंचन टाळावे, जे पानांच्या अनेक रोगांचा एक सामान्य घटक आहे. ठिबक सिंचन हा सर्वोत्तम उपाय आहे. त्यामुळे त्याचा अवलंब करावा. वनस्पतींची वेळोवेळी तपासणी केल्यास रोगांची सुरुवातीची लक्षणे ओळखण्यास मदत होते. प्रसार रोखण्यासाठी त्वरित कारवाई करणे आवश्यक आहे. तंत्रज्ञानाचा वापर करावा. रोग शोधण्यासाठी सेन्सर आणि इमेजिंग सिस्टीम सारख्या तंत्रज्ञानाचा वापर केल्याने सुरुवातीच्या टप्प्यात समस्या ओळखण्याची क्षमता वाढते.

जेव्हा प्रतिबंधात्मक आणि पारंपरिक उपाय अपुरे असतात, तेव्हा बुरशीनाशके आणि जीवाणूनाशकांचा विवेकपूर्ण वापर रोग नियंत्रणात मदत करतो. विशिष्ट पिकांसाठी योग्य तापमान श्रेणी राखून ठेवल्याने तीव्र तापमानात वाढणाऱ्या रोगांचा धोका कमी होण्यास मदत होते. याशिवाय उत्पादकांना रोग ओळखणे, प्रतिबंध करणे आणि व्यवस्थापन पद्धतींबद्दल शिक्षित करणे, त्याच समस्यांना सक्रियपणे संबोधित करण्यात मदत करू शकते. अलीकडे सुशिक्षित युवक पॉलीहाऊसमधील शेतीचा अवलंब करीत असल्याने ही प्राथमिक माहिती त्यांनी लक्षात घ्यायला हवी. त्यामुळे विपरीत परिणाम टाळून अनुकूल उत्पादन घेणे शक्य होते.