नवमतदार नोंदणी विशेष मोहिमेत मुंबई महापालिका सर्वतोपरी सहकार्य करणार, असे आश्वासन महापालिका आयुक्त डॉ. इकबाल सिंह चहल यांनी देऊन सर्व संबंधितांनी निवडणुकीच्या कामाला अधिक प्राधान्य द्यावे, असे निर्देशही दिले. आगामी लोकसभा निवडणुका जाहीर होण्याआधी मुंबई शहर आणि उपनगर या जिल्ह्यांमध्ये नवमतदार विशेष मोहीम राबविली जात आहे. या मोहिमेला अधिक गती देण्यासाठी मुंबई महापालिकेचे आयुक्त इक्बाल सिंग चहल यांच्या अध्यक्षतेखाली आढावा बैठक घेण्यात आली. त्यावेळी ते बोलत होते. या बैठकीस मुंबई शहर जिल्हाधिकारी तथा जिल्हा निवडणूक अधिकारी संजय यादव, बेस्टचे व्यवस्थापकीय संचालक विजय सिंघल, स्वीप नोडल ऑफिसर फरोग मुकादम, विशेष कार्य अधिकारी डॅा. सुभाष दळवी, मुख्य निवडणूक कार्यालय स्वीप समन्वयक, पल्लवी जाधव, मुंबई महानगरपालिकेचे सर्व संबंधित विभागांचे वरिष्ठ अधिकारी उपस्थित होते.

जिल्हाधिकारी तथा जिल्हा निवडणूक अधिकारी संजय यादव यांनी सांगितले की, मतदारयादीत आपले नाव तपासून घ्यावे. नाव नसेल तर मतदार नोंदणीसाठी voters.eci.gov.in / वोटर हेल्पलाईन मोबाईल् ॲप किंवा मतदार मदत क्रमांक 1800221950 येथे संपर्क साधावा. मुंबई शहर आणि उपनगर जिल्ह्यांतर्गत येणारे मुंबई विद्यापीठ, एसएनडीटी महिला विद्यापीठ, आरोग्य विद्यापीठ आणि होमी भाभा स्टेट विद्यापीठ यांच्यासह मुंबई शहर आणि उपनगर भागातील खासगी विद्यापीठांच्या कुलगुरुंशी समन्वय साधून नवमतदारांची नोंदणी वाढविण्यासाठी विशेष नियोजन करण्याबाबत सविस्तर चर्चा करण्यात आली.