बॉम्बे यंग मेन्स ख्रिश्चन असोसिएशन (वायएमसीए) या प्रतिष्ठित संस्थेने १८७५ पासून समाजाच्या सक्षमीकरणासाठी, जीवनात सकारात्मक बदल घडवण्यासाठी तसेच सेवा, क्रीडा आणि सामाजिक विकास यांसारख्या क्षेत्रांमध्ये अविरतपणे कार्य केले आहे. आता ही संस्था आपल्या स्थापनेच्या १५० वर्षांचा महोत्सव साजरा करणार आहे. या ऐतिहासिक क्षणाचे औचित्य साधून, संस्थेचा शतकोत्तर सुवर्णमहोत्सवी वर्धापन दिन शुक्रवार, २५ एप्रिल, २०२५ रोजी नरिमन पॉइंट येथील एनसीपीएच्या जमशेद भाभा थिएटरमध्ये भव्य स्वरूपात साजरा केला जाणार आहे.

या विशेष कार्यक्रमात महाराष्ट्र राज्याचे राज्यपाल सी. पी. राधाकृष्णन प्रमुख पाहुणे म्हणून उपस्थित राहणार आहेत, तर वायएमसीएच्या जागतिक अध्यक्षा सोहेला हायेक सन्माननीय अतिथी म्हणून कार्यक्रमाची शोभा वाढवणार आहेत. याशिवाय, जागतिक वायएमसीए चळवळीतील अनेक मान्यवर, राष्ट्रीय स्तरावरील प्रतिष्ठित व्यक्ती, संस्थेचे हितचिंतक आणि शुभेच्छुक या सोहळ्यात सहभागी होतील, अशी माहिती बॉम्बे वायएमसीएचे अध्यक्ष नोएल अमन्ना यांनी दिली.

भारतीय बास्केटबॉलच्या प्रगतीत वायएमसीएचे योगदान अनमोल आहे, हे सर्वांना ठाऊक आहे. वायएमसीएचे संस्थापक जेम्स नॅस्मिथ यांनी अमेरिकेत या खेळाची निर्मिती केली आणि मुंबईतील संस्थेने या खेळाची ज्योत कायम राखली. कालांतराने, फुटबॉल, टेबल टेनिस, जिम्नॅस्टिक्स आणि नंतर जलतरण व बिलियर्ड्स यांसारख्या इतर क्रीडा प्रकारांना देखील संस्थेने प्रोत्साहन दिले.