पाकिस्तानला आणखी एक धक्का बसू शकतो, असे मानले जात आहे. कारण, आंतरराष्ट्रीय नाणेनिधीच्या कार्यकारी मंडळाची बैठक ९ मे रोजी होणार आहे. या बैठकीत हवामान बदलाशी सामना करण्यासाठी पाकिस्तानच्या १.३ अब्ज डॉलर्सच्या कराराचा आढावाही घेतला जाणार आहे. जर सर्व काही व्यवस्थित झाले तर ७ अब्ज डॉलर्सच्या ‘बेलआउट पॅकेज’ वरही करार होऊ शकतो. तथापि, याआधी भारताने आंतरराष्ट्रीय नाणेनिधीला एक विशेष आवाहन केले आहे.
वृत्तसंस्था रॉयटर्सने एका सूत्राचा हवाला देत म्हटले आहे की, भारताने आंतरराष्ट्रीय नाणेनिधीला पाकिस्तानला दिलेल्या कर्जांचा आढावा घेण्यास सांगितले आहे. पहलगाम हल्ल्यानंतर भारत आणि पाकिस्तानमधील संबंधांमध्ये तणाव आहे. भारताने पाकिस्तानविरुद्ध अनेक कठोर पावले उचलली आहेत. त्यामुळे पाकिस्तान संतापला आहे. दरम्यान, काश्मीरमधील पहलगाममध्ये झालेल्या दहशतवादी हल्ल्यात दहशतवाद्यांनी २६ पर्यटकांची हत्या केली.