मेहंदीने आकर्षक सजवलेले हात म्हणजे तरुणींसाठी आनंदच असतो. मेहंदी रेखाटनाची कला आणि आवड असल्यास आपण स्वत: चे मेहंदी पार्लर सुरु करू शकता. कोणताही व्यवसाय हा त्याच्या नावाने ओळखला जातो. त्यामुळे आपल्या पार्लरचे नाव हे सगळ्यांपेक्षा वेगळे असायला हवे. नावामुळेच लोक जास्तीत जास्त आकर्षित होतात. यासोबतच आपल्या या व्यवसायाच्या नावाचा लोगो तयार करणे आवश्यक असते. लोगोच्या मदतीने आपण पार्लरची जाहिरात करू शकता; किंवा समाजमाध्यमांवर जाहिरात करू शकता. जर आपण मेहंदीचा व्यवसाय घरातूनच करत असाल तर खूपच छान ! पण जर घराच्या बाहेर मेहंदी पार्लर सुरू करण्याचा विचार करत असाल तर त्यासाठी तुम्हाला एखादे छानसे दुकान भाड्याने घ्यावे लागेल. दुकान घेताना हे लक्षात असू द्या, दुकान बाजारात असायला पाहिजे, जिथे खूप साऱ्या महिला येत असतील. म्हणजेच गर्दीच्या ठिकाणी हवे. लोकांना माहीत झाले तरच तुमचा व्यवसाय चालू शकतो.

मेहंदी काढणे ही एक कला आहे. या कलेबद्दल तुम्हाला संपूर्ण माहिती असणे आवश्यक आहे; कारण मेहंदी काढण्याचा व्यवसाय करायचा असेल तर तुम्हाला मेहंदीच्या सर्व नक्षीकामां बद्दल माहिती असायला हवी. तुम्ही जेवढी सुंदर मेहंदी काढाल, तेवढा तुमच्या व्यवसायाचा प्रचार जास्त होईल. प्रत्येक देशानुसार मेहंदीचे खूप सारे प्रकार आहेत. आपण लोकांच्या आवडीनुसार मेहंदी नक्षीकाम करू शकता. मेहंदीचे प्रकार याबद्दल आपल्याला माहिती असायला हवी. यात भारतीय मेहंदी, पारंपरिक मेहंदी, वधू मेहंदी, पाकिस्तानी मेहंदी,अरेबिक मेहंदी, मोरोक्कन मेहंदी, वेस्टर्न मेहंदी, इंडो वेस्टर्न मेहंदी,आफ्रिकन मेहंदी, इंडो अरेबिक मेहंदी हे काही प्रकार आहेत.

मेहंदी पार्लर व्यवसाय घरातूनच करत असाल तर तुम्हाला कोणत्याही प्रकारची गुंतवणूक करण्याची आवश्यकता पडणार नाही. कारण यामध्ये तुमची कला आणि मेहंदी लावण्यासाठी लागणारे मेहंदी कोन एवढेच लागणार आहे. जर तुम्ही मेहंदी पार्लर शॉप उघडणार असाल तर त्यासाठी तुम्हाला दुकानाचे भाडे आणि दुकानासाठी डिपॉझिट भरावे लागेल. साधारणतः मेहंदी काढण्याच्या व्यवसायातून तुम्ही महिना वीस ते तीस हजार रुपये कमवू शकता. आपल्या व्यवसायाची जाहिरात करण्यासाठी सुरुवातीला मेहंदी रेखाटनाचे छोटे छोटे व्हिडिओ तयार करून समाजमाध्यमावर अपलोड करू शकता.